Tempada de xabaril no Tecor Terra Chá: evolución, cifras e reflexións
📊 Tempada de xabaril no Tecor Terra Chá: evolución, cifras e reflexións
A tempada de caza do xabaril avanza con forza no Tecor Terra Chá. Superado xa o segundo mes de batidas, é momento de botar unha ollada aos números e facer balance do que levamos vivido no monte.
🐗 Unha tempada de bo nivel e lances para o recordo
Os nosos cazadores afeccionados están a gozar dunha campaña especialmente activa, tanto en rastros como en capturas. Pero máis alá dos números, destaca un cambio de enfoque: o desfrute dos xabarileiros saboreando cada lance, independentemente do resultado.
Este xeito de entender a caza maior, xa asentado na caza menor, convive co formato tradicional de batida, que esixe coordinación e equipo. Sen cans non hai levantes, e sen tiradores non hai disparos. Cada membro da cuadrilla aporta o seu: o que goza da adrenalina do disparo, o que vibra co latir do can, ou quen vive intensamente o momento do “parado” antes do levante. Todos suman nun equipo único.
Pero a realidade desta modalidade de caza, a batida, é que para que o tirador viva máis lances, é preciso que haxa levantes abondos e, en consecuencia, máis capturas ao aumentar os disparos
📈 Que nos din os números?
Tras os primeiros catro días de caza, xa se intuía un aumento de capturas respecto a anos anteriores. Aínda así, como se comentaba nas tabernas, era cedo para sacar conclusións. A estatística precisa tempo e constancia, e canto menor é o período de análise, máis inflúe o azar.
Previamente á exposición dos datos recabados, citamos posibles explicacións para as variacións:
• Condicións meteorolóxicas: semanas máis secas ou con menos escorrentías favoreceron movementos detectables e capturas, xa que este ano aínda non houbo un só día de caza no que a choiva nos impedira cazar con total normalidade
• Esforzo de caza e organización: mellor coordinación ou aumento do uso de cans rastreadores puideron incrementar capturas por xornada nalgunhas cuadrillas.
• Manexo e poboación: os cambios nas poboacións de xabaril (reprodución, dispoñibilidade de alimentos) poden xerar ciclos, e tal vez este ano o ciclo reproductivo da zona foi moi positivo
• Manadas nómadas: a abundancia de lumes no sur da provincia puido provocar desprazamentos masivos de animais
Agora, con dous meses completados, os datos falan por si sós:
🔢 Comparativa dos primeiros 8 días de caza
| Tempada | Capturas | Media capturas/xornada |
| 20/21 | 146 | 18´25 |
| 21/22 | 143 | 17´87 |
| 22/23 | 115 | 14´37 |
| 23/24 | 104 | 13 |
| 24/25 | 118 | 14´75 |
| 25/26 | 167 | 20´87 |
A tempada actual marca un récord absoluto, cun salto notable respecto ás anteriores.
Capturas por mes
📅 Primeiro mes de caza:
| Tempada | Capturas | Media capturas/xornada |
| 20/21 | 63 | 15´75 |
| 21/22 | 61 | 15´25 |
| 22/23 | 41 | 10´25 |
| 23/24 | 67 | 16´75 |
| 24/25 | 44 | 11 |
| 25/26 | 67 | 16´75 |
📅 Segundo mes de caza:
| Tempada | Capturas | Media capturas/xornada |
| 20/21 | 83 | 20´75 |
| 21/22 | 82 | 20´50 |
| 22/23 | 74 | 18´50 |
| 23/24 | 37 | 9´25 |
| 24/25 | 74 | 18´50 |
| 25/26 | 90 | 22´50 |
🏁 Balance final das últimas tempadas:
| Tempada | Capturas | Media capturas/xornada |
| 20/21 (19 xornadas) | 286 | 15´05 |
| 21/22 (18 xornadas) | 317 | 17´61 |
| 22/23 (20 xornadas) | 282 | 14´10 |
| 23/24 (16 xornadas) | 208 | 13 |
| 24/25 (18 xornadas) | 268 | 14´89 |
Este mes de novembro, tradicionalmente máis frouxo en capturas, sorprendeu cunha xornada de 30 xabarís abatidos, quedando a só un do récord histórico do Tecor, acadado o 11 de outubro.
🔍 E agora, que?
A perspectiva do tempo e a análise “a posteriori” dirán se realmente houbo máis xabaríns esta tempada ou se, como se comenta cada ano, sen excepción, “acabamos con eles”. Porque xa se sabe: para o labrego sempre hai moitos, e para o cazador nunca son suficientes.