SOLTA DE PERDICES NO TECOR TERRA CHÁ
Acércase unha nova tempada de caza para os membros do Societario de cazadores Terra Chá!! Nervios a flor de pel, ansiedade cando vas durmir e despertar antes de que chegue a hora adoitan ser síntomas do primeiro día de caza entre os que somos afeccionados a este bendito deporte! Pero para chegar a ese primeiro día con certas garantías de desfrute, hai que facer antes os deberes…
O societario de cazadores Terra Chá comezou as soltas de perdices nos nosos terreos no día de hoxe, e coma sempre, tocou inicio en vedados e zonas de adestramento. Catrocentas perdices nacidas e criadas en agrocinexética Molledaxa están voando e apeonando nos terreos do noso tecor, para desfrute dos afeccionados á pluma a partir do vindeiro día 1 de agosto, data na que se levanta a prohibición de adestramento nas zonas adicadas en exclusiva a adestramento de cans e aves de cetrería.
Pero isto non remata aquí! Xatemos asignadas datas, horario e lugares de concentración para a solta nas zonas cazables do tecor, ata o total das 10000 perdices previstas, ¡apunta!:
-8 e 9 de agosto, 3200 perdices no campo de fútbol de Cospeito
-16 e 17 de agosto, 3200 perdices no recinto feiral Manuel Vila de Muimenta
-22 e 23 de agosto, 3200 perdices na gasolineira de A Pastoriza
Tódalas concentracións serán ao redor das 8 da mañá. De todas formas, recordaremos datas e horarios en citas próximas para que todo aquel socio que queira acompañarnos nas soltas de patirroxas, teñan a posibilidade de facelo e pasar unha mañá de desfrute no noso rural chairego.
Lembra! O inicio dos adestramentos en zonas dedicadas a tal fin comeza a partir do 1 de agosto, e nas zonas cazables do tecor, a partir do 2 de setembro. E non esquezas levar sempre contigo a tarxeta identificativa de socio, obrigatoria para calquera actividade cinexética no tecor, e que poderás retirar na Caixa Rural Galega de Castro Ribeiras do Lea a partir do 1 de agosto.