NOVO PRESIDENTE NO SOCIETARIO DE CAZADORES TERRA CHÁ!!!!
Vén de rematar o proceso electoral no que estaba inmerso o Societario de Cazadores Terra Chá. Tras a finalización do período de impugnacións á única candidatura presentada en tempo e forma perante a xunta electoral, e ao non recibirse ningunha, resolveuse a proclamación da candidatura encabezada por D. Adrián Rodríguez Morán como nova xunta directiva da sociedade.
Trátase dunha candidatura de carácter continuista, xa que repiten como membros directivos ata 6 persoas da anterior xunta. Todos repiten cargo salvo o presidente saínte, D. Jaime González Penelas, que pasa a ser vicesecretario, e o xa mencionado D. Adrián Rodríguez Morán, que deixa o seu posto de vogal responsable de socios para exercer a presidencia da sociedade.
Nova Xunta Directiva
A nova Xunta Directiva queda por conseguinte así conformada:
| CARGO | MEMBRO | FUNCIÓN PRINCIPAL |
| PRESIDENTE | DON ADRIÁN RODRÍGUEZ MORÁN | Exercerá a presidencia e continuará a súa labor imprescindible de atención ao socio, actividade fundamental para o bo discorrer desta sociedade de caza. |
| VICEPRESIDENTE 1º | DON JUAN ANTONIO PENA PILLADO | Continúa sendo o responsable de caza menor, xestionando a maior partida orzamentaria investida pola sociedade cada ano, e supervisará a zona de caza permanente. |
| VICEPRESIDENTE 2º | DON ADRIÁN CENDÁN RODRÍGUEZ | Asumirá a responsabilidade da xestión da caza maior, coordinando as cacerías colectivas (xabaril, corzo e raposo), e servindo de conexión entre xunta directiva e xefes de cuadrilla. |
| SECRETARIA | DONA MAYRA ROJO REGUEIRA | Continuará coa súa labor de control e supervisión dos procedementos abertos por sinistros na vía pública con animais de fauna salvaxe, e a súa execución monetaria por parte da compañía aseguradora. |
| VICESECRETARIO | DON JAIME GONZÁLEZ PENELAS | O presidente saínte continuará coas súas labores de preparación e execución documental, exercendo como representante no GDR e FGC da Terra Chá, xestionando as axudas públicas, supervisando as publicacións en web e RRSS, e manténdose como enlace coas distintas administracións. |
| TESOUREIRO | DON LUIS VÁZQUEZ SANDE | Exercerá como tesoureiro da sociedade, achegando como valor engadido o seu coñecemento das xestións coa administración autonómica e a súa formación medioambiental. |
| VOGAL | DON JESÚS PAZ PENELAS | Centrarase case en exclusiva na execución do censo de paspallás no tecor, co obxectivo claro e firme da consecución da aprobación da caza en media veda desta especie nun futuro inmediato. |
| VOGAL | DON FCO. JAVIER VEIGA PAREDES | Será o responsable da execución dos distintos plans de colaboración cos organismos oficiais (como a recollida de mostras de sangue), e colaborará con D. Jesús Paz na recompilación de datos de censo de paspallás. |
| VOGAL | DON JUAN JOSÉ FERNÁNDEZ RODRÍGUEZ | Continúa sendo o responsable da xestión da caza de corzo en axexo, piar imprescindible para o cadro orzamentario da sociedade e reclamo para cazadores de toda a península ibérica. |
Outras Incorporacións
Como delegado de cetrería do Societario de Cazadores Terra Chá incorpórase José Antonio Villaverde Bello, máis coñecido como “Alma”. El será o responsable da xestión das soltas e uso da zona de cetrería do Tecor. Ademais, continuará dando soporte informático á sociedade. Mención especial merece a recente creación da nova web da sociedade, de forma totalmente altruista pola súa parte.
Durante un período suposto de 4 anos, como máximo, ata o seguinte proceso electoral, esta xunta directiva está xa a traballar para a consecución dos obxectivos marcados pola mesma, que de seguro traerá, finalmente, numerosos lances e divertimento para tódolos membros cazadores desta sociedade.